Muetter, Vater u d Ching
*********************
Sunntig für Sunntig, meischtens, wes gruusigs Wätter isch gsy, hei mir Ching geng öppe ds glyche Spiili gmacht. We d Mueter vo
der Predigt isch heicho, hei mir gwüsst: Itz isch es günschtig. Ds «Eile mit Weile» hei mir nid lang müesse sueche. Di abgwetzte
Chegeli sy, 4 mal 4, schnäll ufgstellt gsy. Das hei mir lieber gmacht als ds Bibu-Lotto-Spiil, wo no hütt, vereinsamt u veraltet,
i üsem Buffet uf glöibigi Nachkome wartet. Kennts äch no öpper? Vilecht der Jüngscht, der Sämu? Item.
Ds «Eile mit Weile» het aagfange. Es isch gwürfelet worde. D Mueter het mytüüri gäng Glück gha bim Würfele. Si het gyferet, nid
linggs u rächts gluegt, nume no graduus i ds Ziil!! Aber üses versteckte Grinse u üses Enang-mit-de-Ellböge-Müpfe het si i ihrem
Yfer inne nid gmerkt. Mir heis nämlech immer eso greiset, dass es für üüs vor Mueters Ziil isch gfährlech worde. «Itz verwütsche
nech, itz verwütsche nech!», dänkt si u würfelet, nume üüs vor Ouge, wo si unbedingt wott heitue. 1, 2, 3, 4: U scho isch sy näbe
ihrem Ygang vom Ziil verby gsy, ohni z merke, dass si ja hätt ynechönne! Üüs het si de meischtens glych nid verwütscht, aber si
het derfür no einisch e Rundi müesse drääje. Dihr chöit öich nid vorstelle, wi mir pfupft u glachet hei, bis de d Mueter albe
gmerkt het, dass si sech gschyder uf ds Spiil konzäntriert hätt, statt a der Predigt umezstudiere, wo si vom Chalchofe mitgno
het.
D Mueter isch nid nachtragend gsy, we si verlore het. Nei, si het härzhaft mit üüs chönne lache. Si isch o nid ufe Chopf gheit
gsy. Wär weis, si het sich vilecht mänggisch sogar äxtra la verwütsche, u mir heis eifach nume nid gmerkt. So isch üsi Mueter
gsy. We ihres Umfäld, ihri Familie isch glücklech gsy, het o si sech wohl gfüelt.
U der Vatter het de am Schluss immer no usggliche: Wär eine vo der Würfle öppe no manipuliet het, usem Füfi es Vieri oder usem
Drüü es Sächsi härezouberet het, dä het i d Chuchi müesse ga abwäsche oder aafüere für ds Znacht. Je nach Wätter hets de albe
zünftig grouchnet. Zibele rüschte für di gueti Spaghettisosse u no da giftig Rouch i den Ouge: De hei mir de albe gha für zwänzg
u das als müesse nachegränne, wo mir bim Spile hei müesse lache.
Das isch eine vo de Wüeschtwätter-Sunntige im Schluechthüsli gsy!
Öiji Schwoscht, d Martle us Thun, Switzerland
zurück
© by fiechterei.net